Poet
luuTe maze jo ham ne tumhare ugaal ke
mar mar ga.e raqib lahu Daal Daal ke
be-yar dud-o-lukka mire asman bana
saaqi bana de maah piyala uchhal ke
bigḌe hue ho aaj banavaT na kijiye
ai jaan chhupte hain kahin tevar malal ke
pahuncha diya hai dam men lab-e-bam-e-yar tak
qaa.il hain ham to apni kamand-e-ḳhayal ke
duniya-e-dun ko aankh uTha kar na dekhiye
ashiq javan hote hain kab pir-zal ke
apne hi silsile men hai bai.at unhen nasib
zulfon ke sab faqir hamare hain baal ke
TuTen na ḳhaar aur kahin phuTen na aable
vahshat men paanv rakhte hain apna sambhal ke
vahshat men apne haath se pahuncha hamen gazand
pachhta.e astin men ham saanp paal ke
ham un se aur vo ham se dam-e-sulh the ḳhajil
chhinTe laḌa kiye araq-e-infi.al ke
be-yar mai-kashi bhi jo kiije to gham ke saath
jam-o-subu bana.iye gard-e-malal ke
dil men tumhari yaad bhi hai jaan lijiye
tir-e-nigah laga.iega dekh-bhal ke
danton men missi mal ke agar kijiye ḳhelal
nazron men mail surma hon tinke ḳhelal ke
raftar-e-kilk qahr hai aafat sarir-e-kilk
mazmun jo likh raha huun tire bol-chal ke
ham-mashrabon men chal ke ‘qalaq’ mai-kashi karo
jhagḌe vahan nahin hain haram-o-halal ke
Leave a Reply