Aslam Noor Aslam
fasil-e-zat par itra raha huun
zamane se bichhaḌta ja raha huun
main patthar ke na.e paikar bana kar
ba-shakl-e-mom Dhalta ja raha huun
vo ik chehra vo palken aur tabassum
ghazal ko us ki lai pe ga raha huun
tasavvur men kisi se baat kar ke
lab-o-lahje pe us ke chha raha huun
uḌanon se abhi ghafil huun apni
zamin ko asman batla raha huun
muamma ban ga.i hai zindagi ab
main uljhi zulf ko suljha raha huun
abhi us gaanv men mele lagenge
abhi jis gaanv par manDla raha huun
shanasa.i hui ḳharon se itni
gulon ko dekh kar ghabra raha huun
main lafzon men hasin ruman la kar
na.e lahje men Dhalta ja raha huun
vahi hai vasl ki jhuTi tasalli
main ‘aslam’ ruuh ko taḌpa raha huun
Leave a Reply