gar ghair ke ghar se na dil-aram nikalta
dam kaahe ko yuun ai dil-e-nakam nikalta
main vahm se marta huun vahan roab se us ke
qasid ki zaban se nahin paigham nikalta
karte jo mujhe yaad shab-e-vasl adu tum
kya subh ki khurshed na ta-sham nikalta
jab jante tasir ki dushman bhi vahan se
apni tarah ai gardish-e-ayyam nikalta
har ek se us bazm men shab puchhte the naam
tha lutf jo koi mira hamnam nikalta
kyuun kaam talab hai mire azar se gardun
nakam se dekha hai kahin kaam nikalta
thi nauha-zani dil ki janaze pe zaruri
shayad ki vo ghabra ke sar-e-bam nikalta
kanta sa khatakta hai kaleje men gham-e-hijr
ye khaar nahin dil se gul-andam nikalta
huren nahin ‘momin’ ke nasibon men jo hoen
but-khane hi se kyuun ye bad-anjam nikalta