Tere Bimar Ki Shayad Wida-E-Jaan Hai Tan Se

tire bimar ki shayad vida-e-jan hai tan se

janaze ki vagarna vaan hai tayyari ka kya baais

kahin vaqt-e-khitab ai yaar apne munh se nikla tha

laga kahne ki mujh men aap men yaari ka kya baais

mariz apne ko dekha aah khuun aluda kya kya the

na tha gar dard dil men nala-o-zari ka kya baais

nahin kuchh zor se leta koi dil do na do ‘mamnun’

ye majburi ka kya maujib ye na-chari ka kya baais

mire siine men gar atish-kada pinhan nahin zalim

fughan o aah se har dam sharar-bari ka kya baais

tasavvur chashm-e-khuban ka muqarrar tum ko rahta hai

vagarna hazrat-e-dil itni bimari ka kya baais

hua jab kaam apna kaam dil jab puchhne aae

mujhe gham kha chuka ab meri gham-khvari ka kya baais

ajab divangi hai koi bhi yuun dil phansata hai

bahut daana the tum ‘mamnun’ giraftari ka kya baais

Leave a Comment