Poet
na ahl-e-dil se na ahl-e-nazar se milta hai
shu.ur-e-zat faqat apne dar se milta hai
tumhare faiz se khilte hain zindagi men gulab
junun ko rang tumhari nazar se milta hai
bikhar rahi hain ziya.en nikhar rahi hai faza
tumhara husn jamal-e-sahar se milta hai
farogh-e-shauq hai ya irtiqa-e-jazb-e-darun
pata ab apna tumhari ḳhabar se milta hai
vahi hai hasil-e-ishrat vahi vaqar-e-hayat
sukun-e-dil jo gham-e-mo’tabar se milta hai
kahan phir izn-e-safar mil ga.i agar manzil
safar ka zauq faqat rahguzar se milta hai
vo kam-suḳhan hain magar ham se be-niyaz nahin
suragh-e-dil suḳhan-e-muḳhtasar se milta hai
nisar us pe do-alam ke mai-kade ‘parvez’
vo ek jaam jo un ki nazar se milta hai
Leave a Reply