sham-e-gham bimar ke dil par vo ban aa.i ki bas
har taraf tarikiyan aur aisi tanha.i ki bas
dil ki barbadi ka afsana abhi chheḌa hi tha
anjuman men har taraf se ik sada aa.i ki bas
un ki ankhon men jo ashk aa.e to yuun aa.e ki uf
un ke honTon par hansi aa.i to yuun aa.i ki bas
umr-bhar ke vaste chup ho gaya bimar-e-gham
aap ne ki bhi to ki aisi masiha.i ki bas
kya kahen ‘rahi’ ki apnon se hamen kya kya mila
vo navazish vo karam vo izzat-afza.i ki bas
Leave a Reply