pattharon men aa.ina maujud hai
ya.ani mujh men dusra maujud hai
zamzama-paira koi to hai yahan
sehn-e-gulshan men hava maujud hai
ḳhvab ho kar rah gaya apne liye
jaag uThne ki saza maujud hai
ik samundar hai dil-e-ushshaq men
jis men har mauj-e-bala maujud hai
asmani ghanTiyon ke shor men
us badan ki har sada maujud hai
main kitab-e-ḳhak kholun to khule
kya nahin maujud kya maujud hai
jannat-e-arzi bulati hai tumhen
aao ‘sarvat’ rasta maujud hai
Leave a Reply