Nigah-E-Bad-Guman Hai Aur Main Hun

nigāh-e-bad-gumāñ hai aur maiñ huuñ

fareb-e-āshiyāñ hai aur maiñ huuñ

sharīk-e-be-kasī aa.e kahāñ se

zamīñ par āsmāñ hai aur maiñ huuñ

udhar kyā ghūrtī hai kasmapursī

mirā azm-e-javāñ hai aur maiñ huuñ

sarāpā-gosh hai sub.h-e-shab-e-tār

kisī kī dāstāñ hai aur maiñ huuñ

ghuTā jaatā hai dam ai soz-e-ehsās

tah-e-dāman dhuāñ hai aur maiñ huuñ

havādis ab jise chāheñ sarāheñ

nasīb-e-dushmanāñ hai aur maiñ huuñ

qafas naġhmoñ se guuñj uThtā hai ‘yāqūb’

umīd-e-ḳhush-bayāñ hai aur maiñ huuñ

Leave a Comment