Poet
nigah-e-bad-guman hai aur main huun
fareb-e-ashiyan hai aur main huun
sharik-e-be-kasi aa.e kahan se
zamin par asman hai aur main huun
udhar kya ghurti hai kasmapursi
mira azm-e-javan hai aur main huun
sarapa-gosh hai sub.h-e-shab-e-tar
kisi ki dastan hai aur main huun
ghuTa jaata hai dam ai soz-e-ehsas
tah-e-daman dhuan hai aur main huun
havadis ab jise chahen sarahen
nasib-e-dushmanan hai aur main huun
qafas naghmon se guunj uThta hai ‘yaqub’
umid-e-ḳhush-bayan hai aur main huun
Leave a Reply