tum ek hi libas nahin pahan sakte
aur vo hai safar
27-sal se is arsa-e-be-zamini par
main safar hi to pahanta aaya huun
ek baar ek qasbe men
ek nannhi si bachchi ne mujh se
meri udasi puchhi thi
meri udasi mere andar thi
aur bachchi ka matlab bahar tha
bahar ki quvvat ne meri chhipi hui rotiyan chhin liin
tum ne kahin se sun liya
ki jo mitti gosht se chipak jaati hai
us se ek atal makan banta hai
so tum atal makan men atal ban gae
tum ne mujh se meri shahriyat chhin li
kyunki
main un logon men se nahin tha
jinhon ne mahz auraton ke naam
sunghne men kai baras guzar diye
phir shayad unhen koi chor-darvaza mil gaya
kuchh log jo jail se chhut ke aae the
unhon ne apne gharon ki salakhon ko
niile rang se rang diya
kyunki niile rang ki niind
aram aur vahm ke darmiyan
shayad ek taank hoti hai
main ne kabhi tonic nahin piya
mere paas to kuchh jama hui rotiyan thiin
unhin men kahin khane baitha tha
ki shahron ke chaurahon ki samt
jaati hui dhuup bahut tez hogi
ek mulk ka dhuan
dusre mulk ki faslon men sarayat kar gaya
tum nahin jante ki ye sab kuchh kyuun hua
tum apne makan men atal rahe
main aage chal diya
mujhe chor-darvaza nahin mila
Leave a Reply