ḳhayal-o-ḳhvab se niklun zuhur tak dekhun
safar ke da.ere toḌun ubuur tak dekhun
mire liye hain ye haft-asman-o-haft-zamin
to kis liye tire jalve main tuur tak dekhun
samajh saka huun tujhe bas shu.ur ki had tak
ye fikr hai ki tujhe la-shu.ur tak dekhun
ragen chaTaḳh ga.iin rishton ki shorishen kaisi
sada lahu ki jo aa.e to duur tak dekhun
ulajh na ja.un kahin reshmi ḳhayalon men
tira ‘jamal’ pas-e-rang-o-nur tak dekhun
Leave a Reply