chhae hue hain chaar taraf para-ha-e-abr
aghosh men liye hue duniya-e-ab-o-rang
mere liye hai un ki garaj men surud-o-chang
paigham-e-imbisat hai mujh ko sada-e-abr
utthi hai halke halke suron men nava-e-abr
aur qatr-ha-e-ab bajate hain jal-tarang
gahraiyon men ruuh ki jaagi hai har umang
dil men utar rahe hain mire naghm-ha-e-abr
muddat se lut chuke the tamanna ke bar-o-barg
chhaya hua tha ruuh pe goya sukut-e-marg
chhoda hai aaj ziist ko khvab-e-jumud ne
un badalon se taaza hui hai hayat phir
mere liye javan hai ye kaenat phir
shadab kar diya hai dil un ke surud ne!
Leave a Reply