akhlaque-bandvi

Idhar Charagh Jal Gae Udhar Charagh Jal Gae

idhar charagh jal gae udhar charagh jal gae

jidhar jidhar uThi tiri nazar charagh jal gae

ye aur baat raat bhar ka tai na kar sake safar

magar ye kam nahin ki vaqt par charagh jal gae

hava ka aisa zor tha ki ik bala ka shor tha

isi faza men jo the ba-hunar charagh jal gae

hai baat yuun to raat ki magar na ehtiyat ki

to kya karoge daf.atan agar charagh jal gae

jo saath sub.h se chale vo saare log din dhale

usi taraf ko ho liye jidhar charagh jal gae

vo tirgi ka jaal tha ki ab safar muhal tha

hua ye tere naam ka asar charagh jal gae

More Poems

Leave a Comment