Hai Baal-O-Par Mein Wahshat Si Be-Samt uDanen Bharti Hun

Naina Adil

hai bal-o-par men vahshat si be-samt uḌanen bharti huun

apne andar ke jangal men gum ho jaane se Darti huun

phir aas ka dariya bahta hai phir sabza ug ug aata hai

phir dhuup kinare baiThi main ik ḳhvab ki chhagal bharti huun

kyon aag dahakti hai mujh men kyon barish hoti hai mujh men

jab dhyan se milti huun tere jab tere man men utarti huun

kab mujh ko riha.i milti thi nahaq jo qafas bhi toḌ diya

baj uThti hain zanjiren si main paanv jahan bhi dharti huun

ik phuul ki pati ka bistar ik os ke moti ka takiya

titli ke paron ko oḌh ke main ḳhvabon men aan Thaharti huun

dil gham se riha.i chahta hai aur vo bhi jiite ji sahab

phir tujh men panah le leti huun phir ḳhud se kinara karti huun

hain naag ka phan kaali raten lamha lamha Dasti javen

sau baar taḌapti huun sahab sau baar main jiiti marti huun