Arif Abdul Mateen
ham bhi nadan hain samajhte hain ki chhaT ja.egi
tirgi nuur ke paikar men simaT ja.egi
log kahte hain mohabbat se tamanna jis ko
meri shah-e-rag usi talvar se kaT ja.egi
tum jise baanT rahe ho vo sitam-dida-zamin
zalzala aa.ega kuchh aisa ki phaT ja.egi
qaid huun gumbad-e-be-dar men miri apni sada
mujh tak aa.egi magar aa ke palaT ja.egi
baanT ji bhar ke use dahr ke mahrumon men
pyaar daulat to nahin hai ki jo ghaT ja.egi
bad-e-sarsar se na ghabra ki ye chal kar ‘arif’
kitne chehron se naqabon ko ulaT ja.egi
Leave a Reply