Basir Sultan Kazmi
ḳhat men kya kya likhun yaad aati hai har baat pe baat
yahi behtar ki uTha rakhkhun mulaqat pe baat
raat ko kahte hain kal baat karenge din men
din guzar jaa.e to samjho ki ga.i raat pe baat
apni baton ke zamane to hava-burd hue
ab kiya karte hain ham surat-e-halat pe baat
log jab milte hain kahte hain koi baat karo
jaise rakkhi hui hoti ho mire haat pe baat
mil na sakne ke bahane unhen aate hain bahut
DhunD lete hain koi ham bhi mulaqat pe baat
dusron ko bhi maza sunne men aa.e ‘basir’
apne aansu ki nahin kijiye barsat pe baat
Leave a Reply