Nazron Ki Tarah Log Nazare Ki Tarah Hum

nazroñ kī tarah log nazāre kī tarah ham

bhīgī huī palkoñ ke kināre kī tarah ham

ye ruup to sūraj ko bhī hāsil nahīñ hotā

kuchh der rahe sub.h ke taare kī tarah ham

ham ne bhī to ik umr ye ġham saiñt ke rakkhe

ab kyā hai jo bhārī haiñ ḳhasāre kī tarah ham

ik qaum hai chāñdī kī jo miTTī pe khiñchī hai

sahrā meñ haiñ bahte hue dhāre kī tarah ham

is raat meñ pal pal kabhī raushan kabhī rū-posh

ik duur ke taare ke ishāre kī tarah ham

yakjā.ī se pal bhar kī ḳhud-ārā.ī bhalī thī

sho.ale se nikal aa.e sharāre kī tarah ham

ye faḳhr kisī aur se mansūb na hogā

har gaam haiñ ḳhud apne sahāre kī tarah ham

Leave a Comment