Irfan Sattar
ek duniya ki kashish hai jo idhar khinchti hai
ik tabi.at hai ki azar-e-hunar khinchti hai
ek janib liye jaati hai qana.at mujh ko
ek janib havas-e-luqma-e-tar khinchti hai
hijr ka aish kahan hai miri qismat men ki ab
zindagi ranj ba-andaz-e-digar khinchti hai
ek manzil hai jo imkan se bahar hai kahin
ik masafat hai ki bas gard-e-safar khinchti hai
ik taraf dil ka ye israr ki ḳhalvat ḳhalvat
ik taraf ḳhvahish-e-taskin-e-nazar khinchti hai
Leave a Reply