apna hi sa ai nargis-e-mastana bana de
main jab tujhe janun mujhe divana bana de
har qaid se har rasm se begana bana de
divana bana de mujhe divana bana de
ik barq-e-ada khirman-e-hasti pe gira kar
nazron ko miri tuur ka afsana bana de
har dil hai tiri bazm men labrez-e-mai-e-ishq
ik aur bhi paimana se paimana bana de
tu saqi-e-mai-khana bhi tu nashsha o mai bhi
main tishna-e-hasti mujhe mastana bana de
allah ne tujh ko mai o mai-khana banaya
tu saari faza ko mai o mai-khana bana de
tu saqi-e-mai-khana hai main rind-e-bala-nosh
mere liye mai-khane ko paimana bana de
ya dida-o-dil men mire tu aap sama ja
ya phir dil-o-dida hi ko virana bana de
qatre men vo dariya hai jo aalam ko dubo de
zarre men vo sahra hai ki divana bana de
lekin mujhe har qaid-e-taayyun se bacha kar
jo chahe vo ai nargis-e-mastana bana de
aalam to hai divana jigar! husn ki khatir
tu apne liye husn ko divana bana de
kab tak nigah-e-yar na hogi mutabassim
tu apna har andaz harifana bana de
munkir tu na ban husn ke eajaz-e-nazar ka
kahne ke liye apne ko begana bana de
jab tak karam-e-khas ka dariya na umand aae
tu aur bhi haal apna safihana bana de
but-khane aa nikle to kaaba ki bina daal
kaabe men pahunch jaae to but-khana bana de
jo mauj uthe dil se tire josh-e-talab men
sar rakh ke vahin sajda-e-shukrana bana de
jab mail-e-altaf nazar aae vo khud-bin
tu har nigah-e-shauq ko afsana bana de
kaunain bhi mil jaae to daman ko na phaila
kaunain ko bhula hua afsana bana de
phir arz kar is tarah ‘jigar’ shauq o adab se
bebak agar jurat-e-rindana bana de
tujh ko nigah-e-yar! qasam mere junun ki
naseh ko bhi mera hi sa divana bana de
main huun tire qadmon men mujhe kuchh nahin kahna
ab jo bhi tira lutf-e-karimana bana de
Leave a Reply