Sahil Pe Lai Aur Safine Dubo Diye

sāhil pe laa.ī aur safīne Dubo diye

yuuñ zindagī ne ham ko hañsāyā ki ro diye

ahl-e-chaman ne jashn-e-bahārāñ ke naam se

vo dāstāñ sunā.ī ki dāman bhigo diye

zabt-e-ġham-e-firāq kī majbūriyāñ na pūchh

dil meñ kisī kā naam liyā aur ro diye

fariyād kī hai baat magar ab sunegā kaun

ik nāḳhudā ne kitne safīne Dubo diye

ai vā.e-sa.ī-e-zabt ki aksar tire huzūr

hañsne kā ehtimām kiyā aur ro diye

un āñsuoñ kā dekhne vaalā koī na thā

jin āñsuoñ meñ ham ne tabassum samo diye

rāh-e-junūñ meñ kaam ḳhirad se liyā hī thā

zo.af-e-talab ne paañv meñ kāñTe chubho diye

tajdīd-e-ahd-e-ishq huī aaj yuuñ ‘shamīm’

nazreñ milīñ salām kiyā aur ro diye

Leave a Comment