tiri ḳhushbu tira lahja main kahan se la.un
tu bata de tire jaisa main kahan se la.un
chand ko gher ke rakhte hain sitare har shab
phir bhala chand ko tanha main kahan se la.un
chashm-e-tar men bhi rahe aur bharam bhi rakh le
aisa Thahra hua dariya main kahan se la.un
us ki ḳhvahish hai ta.alluq ka koi naam na ho
aisa be-nam sa rishta main kahan se la.un
jazb kar le mujhe ḳhud men jo sama le mujh ko
ḳhushkiyon men vo jazira main kahan se la.un
khinch laa.e jo gunahon ke samundar se mujhe
ik nadamat ka vo qatra main kahan se la.un
Leave a Reply