Idris Babar
main kuchh dinon men use chhoḌ jaane vaala tha
jahaz gharq hua jo ḳhazane vaala tha
gulon se bu-e-shikast uTh rahi hai naghmagaro
yahin kahin koi kuuze banane vaala tha
ajiib haal tha is dasht ka main aaya to
na ḳhaak thi na koi ḳhaak uḌane vaala tha
tamam dost alaav ke gird jam.a the aur
har ek apni kahani sunane vaala tha
kahani jis men ye duniya na.i thi achchhi thi
aur is pe vaqt bura vaqt aane vaala tha
bas ek ḳhvab ki duuri pe tha vo shahr jahan
main apne naam ka sikka chalane vaala tha
shajar ke saath mujhe bhi hila gaya ‘babar’
vo saneha jo use pesh aane vaala tha
Leave a Reply