Syed Mohammad Askari Arif
main ne maana ki mulaqat nahin ho sakti
to kya ab tum se koi baat nahin ho sakti
dil men raushan hain miri jaan tiri yadon ke charagh
shahr-e-ulfat men kabhi raat nahin ho sakti
batin-e-qalb-o-jigar men hi basa le mujh ko
zahiran gar tu mire saath nahin ho sakti
is ka sheva hai mohabbat men baghavat karna
mo’atabar us ki kabhi zaat nahin ho sakti
ishq ka khel bhi ye soch ke main haar gaya
sachche ashiq ki kabhi maat nahin ho sakti
Leave a Reply