kis ko kahte hain jafa kya hai vafa yaad nahin
ai mohabbat mujhe kuchh tere siva yaad nahin
dekhiye hoti hai kis tarah shab-e-gham ki sahar
ab to ai dard-e-jigar koi dua yaad nahin
ho ga.i ḳhatm rah-o-rasm-e-mohabbat shayad
main vafa bhuul gaya un ko jafa yaad nahin
yuun bhi kar sakte ho barbad-e-mohabbat pe karam
ham ne maana ki tumhen ahd-e-vafa yaad nahin
dil-e-divana pe ilzam lagane vaale
jis ne divana banaya vo ada yaad nahin
jis se ‘aḳhtar’ ho mire dard-e-mohabbat ka ilaaj
kya masiha-nafason ko vo dava yaad nahin
Leave a Reply