Shuja Khaavar
ḳhud farishte to nahin hain jo mujhe le ja rahe hain
bande mujh ko kyuun ḳhuda ke samne le ja rahe hain
dil jigar shahon ke aage kis liye le ja rahe hain
rut qasidon ki hai aur ham marsiye le ja rahe hain
ham bhi do ik sher le chalte hain tere chashm o lab se
phuul bhi ḳhushbu tujhi se maang ke le ja rahe hain
kandha dete chal rahe hain raste valon ko bhi ham
apni mayyat ko bhi ham kis shaan se le ja rahe hain
aaj pahli baar tauba ka irada ho raha hai
shaiḳh-sahib aaj ham ko mai-kade le ja rahe hain
Leave a Reply