Qadir Siddiqi
gaya vo daur to ḳhvabon ke silsile bhi ga.e
dil-o-nigah ke pur-kaif hausle bhi ga.e
vahi ga.e to phir ab shikva-o-shikayat kya
shikayaten ga.iin shikve ga.e gile bhi ga.e
bikhar ke rah ga.i tasvir arzuon ki
ummid-o-as-o-tamanna ke qafile bhi ga.e
yahi nahin ki bahut si latafaten ruThin
ada-o-naz ke rangin marhale bhi ga.e
bujhe bujhe se hain ashaon ke kanval qadir
ḳharosh-e-zist gaya dil ke valvale bhi ga.e
Leave a Reply