sara-shagufta

Aadha Kamra

us ne itni kitaben chaat Dalin

ki us ki aurat ke pair kaghaz ki tarah ho gae

vo roz kaghaz pe apna chehra likhta aur ganda hota

us ki aurat jo khamoshi kadhe baithi thi

kaghazon ke bhunkne par sartre ke paas gai

tum rambo aur freud se bhi mil aae ho kya

saifu meri saifu mirabai ki tarah mat bolo

main samajh gai ab us ki ankhen

keats ki ankhen hui jaati hain

main jo sohni ka ghada uthae hue thi

apna naam laila bata chuki thi

main ne kaha

laila majme ki baten mere samne mat dohraya karo

tanhai bhi koi chiiz hoti hai

shakespeare ke Daramon se chun chun kar us ne thumke lagae

mujhe tanha dekh kar

sartar freud ke kamre men chala gaya

vo apni theory se gir gir padta

main samajh gai us ki kitab kitni hai

lekin bahr haal sartre tha

aur kal ko majme men bhi milna tha

main ne bhiid ki taraf ishara kiya to bola

itne saare satron se mil kar tumhen kya karna hai

agar ziyada zid karti ho to apne varis ‘shah’

hiir sayyal ke kamron men chale chalte hain

sartre se istiara milte hi

main ne ek tanqidi nashist rakkhi

main ne aadha kamra bhi badi mushkil se hasil kiya tha

so pahle aadhe freud ko bulaya

phir aadhe rambo ko bulaya

aadhi aadhi baat puchhni shurua ki

john Donne kya kar raha hai

second hand shairon se najat chahta hai

choron se sakht nalan hai

dante is vaqt kahan hai

vo jahannam se bhi farar ho chuka hai

us ko shubha tha

vo khvaja-saraon se ziyada der muqabla nahin kar sakta

apne pas-manzar men

ek kutta musalsal bhunkne ke liye chhod gaya hai

is kutte ki khaslat kya hai

biyatarche ki yaad men bhunk raha hai

tumhara tasavvur kya kahta hai

satron ki tasavvur ke lihaz se

ab us ka rukh goete ke ghar ki taraf ho gaya hai

baaqi aadhe kamre men kya ho raha hai

ladkiyan

kya harf chun rahi hain

istiare ke lihaz se

haram ke bachche gin rahi hain

ladkiyon ke naam qafiye ki vajh se

sartre ziyada nahin rakh pa raha hai

is liye un ki ghazal chhoti pad rahi hai

zamin ke lihaz se naqqad

apne kamron se ukhadne ke liye tayyar nahin

lekin unhon ne vaada kiya hai

saare thinker ikatthe honge

aur bataenge ki society kiya hai

aur kyuun hai

vaise havaon ka kaam hai chalte phirte rahna

dur-andesh ki aankh kaisi hai

cigarette ke kash se badi hai

vo ghade se patthar nikal kar gin rahe the

aur kah rahe the main is ghade ka baani huun

chaae ke saath ghibat ke cake

zaruri hote hain

aur chughal-khori ki kitab ka dibacha

har shakhs likhta hai

zabanon men bujhe tiron se maqtul zinda ho rahe hain

bada iblagh hai

society ke chehre pe vo zaban chalti hai

ki ek ek bande ke paas

kitabon ki riyasat bande se ziyada hai

riyasat men

maharaniyon ke qisse ghadne par

ilm ki badi milti hai

bill ke sada-kaghaz par

ilm likh diya jaata hai

taaza daryaft par

har fard ki mutthi garm hoti hai

pahle ye batao jhujhune ki tarikh-e-paidaish kya hai

main koi naqqad huun jo tarikh dohrata phirun

kisi ka kalam padh lo

tarikh malum ho jaegi

tumhari ankhon men aansu

‘mir’ ki kitab ka dibacha likhna hai

ye kis ki patti hai

naqqad bhaai ki

ye kis ki aankh hai

mujhe to saifu bhabhi ki malum ho rahi hai

aur ye haath

ghalib ka lagta hai

bakte ho

zar ki amaan paun to bataun

jitne naam yaad the bata diye

lekin tumhara tasavvur kya kahta

main dum hilane ke siva kya kar sakta huun

More Poems

Leave a Comment