ishq-e-sitam-parast kya husn-e-sitam-shi.ar kya
ham bhi unhin ke hain to phir apna bhi e’tibar kya
ishrat-e-zist ki qasam ishrat-e-musta.ar kya
gham bhi jo mustaqil na ho gham ka bhi e’tibar kya
miTti hui hayat kya luTti hui bahar kya
ya.ani qarib-e-sub.h-e-gham sham.a ka e’tibar kya
yaad se un ki kaam rakh dard ka ehtimam rakh
maut bhi aa hi ja.egi maut ka intizar kya
baḌhti rahengi ta-ba-kai ahl-e-junun ki vahshaten
chhupte rahenge vo pas-e-a.ina-e-bahar kya
qimat-e-ka.enat kya un ki nigah-e-naz men
fitna-e-hashr ke liye fitna-e-rozgar kya
rah-e-daraz jabr hai kahte hain jis ko zindagi
rah-e-daraz-e-jabr men manzil-e-iḳhtiyar kya
itna bhi intizar-e-dost haa.e ye e’tibar-e-dost
ai dil-e-be-qarar-e-dost dost pe iḳhtiyar kya
ishq se sar-garan na ho husn se bad-guman na ho
jis ke liye ḳhizan na ho us ke liye bahar kya
yaad men teri pa liya main ne sukun-e-zindagi
ab tiri yaad men mujhe chain kya qarar kya
meri nazar se dekhiye apna jamal-e-be-misal
chashm-e-bahar-saz men a.ina-e-bahar kya
meri vafa vafa nahin un ki jafa jafa nahin
haa.e usi ka naam hai alam-e-e’tibar kya
‘basit’-e-figar ki yaad bhi kya na aa.egi
ab na sunenge ham-vatan nala-e-be-qarar kya
Leave a Reply