Hamdam Kashmiri
zaban ke saath yahan za.iqa bhi rakkha hai
tumhara zikr tumhara pata bhi rakkha hai
saja ke dhuup kaḌi aaj ghar se nikle hain
kisi ke saa.e ko zer-e-qaba bhi rakkha hai
dhamal ke liye kya kam zamin paḌti hai
jo asman ko sar par uTha bhi rakkha hai
kisi tarah se bhi raunaq baḌhe mire ghar ki
bujha hua hi sahi ik diya bhi rakkha hai
mira shi.ar ḳhayanat nahin amanat hai
mila hai zaḳhm jo us ko hara bhi rakkha hai
sada-e-dil-zadgan aa.e is taraf shayad
daricha ek makan ka khula bhi rakkha hai
Leave a Reply