Poet
phuTi bhali vo aankh jo aansu se tar nahin
kis kaam hai vo siip ki jis men guhar nahin
mun.im hai kya ki jis se koi bahra-var nahin
kis kaam ka vo naḳhl ki jis men samar nahin
banda huun be-ḳhudi ka main us mast ki jise
ashob-e-roz-e-hashr se aslan ḳhabar nahin
ya-rab ḳhalish se aah ki ho jo na bahra-mand
jis dil ka takiya-gah sar-e-neshtar nahin
ai dil ba-rang-e-ghuncha na mil gul-ruḳhon se tu
apni girah men un ke khilane ko zar nahin
saaqi hai shab ki dast-darazi ka kya gila
pyare jo be-ḳhudi men hua mo’tabar nahin
nalan na huun gali men tiri main to kya karun
murgh-e-chaman men naala siva kuchh hunar nahin
jon ashk ek laghzish-e-pa men ga.e hain paar
hasti se ta-ba-nisti chandan safar nahin
‘qa.em’ jo is tarah tu phire hai ḳharab-o-ḳhvar
ai ḳhanuman-ḳharab magar tere ghar nahin
Leave a Reply