Baqi Siddiqui
har taraf bikhre hain rangin saa.e
rah-rau koi na Thokar khaa.e
zindagi harf-e-ghalat hi nikli
ham ne ma.ani to bahut pahna.e
daman-e-ḳhvab kahan tak phaile
reg ki mauj kahan tak jaa.e
tujh ko dekha tire va.ade dekhe
unchi divar ke lambe saa.e
band kaliyon ki ada kahti hai
baat karne ke hain sau paira.e
bam-o-dar kaanp uThe hain ‘baqi’
is tarah jhuum ke badal aa.e
Leave a Reply