Bushra Ejaz
mire khamosh khuda
saath mire bol zara
mire andar to utar
meri tamanna men dhadak
main jo ankhon men
thakan rakh ke safar karti huun
miri raton ko mire khvab na das jaaen kahin
mere andar vo khayalat na bas jaaen kahin
jin ko mamnua zaminon ki hikayat kaha jaata hai
tirgi par jise likkhi hui vo raat kaha jaata hai
jis ki qismat men kabhi koi sitara na diya hota hai
jis ke mathe pe savere ka
koi bosa kabhi sabt nahin ho paata
vo jo mahrum-e-tamanna hai dua ka dar hai
mire khamosh khuda!
vaqt be-vaqt miri ankhon men
tapte paani ki ye bhadkan kyuun hai
mere mathe pe tamanna ka koi rang nahin
phir mire haath ki rekhaon men
uljhi hui duniya ki kahani kyuun hai
vo jo atraf mire
mujh ko nazar aati nahin
mere dil men vo udasi ki
ravani kyuun hai
kaun hai vo jo mujhe
”kuk” ka an-dekha bulava de kar
”huk” ki ot men chhup jaata hai
jo mujhe mere tasavvur ke kisi aks men
raushan kar ke
aina-khane men phir aag laga jaata hai
jis ki ankhon men
mire khvab ke saare manzar
apne hone ki gavahi men jiye jaate hain
vo gavahi ki sahifon men
jise main ne tilavat to kiya hai lekin
vo gavahi mere hone ki gavahi to nahin
main kahan huun
mira maalum kahan hai
kis ne
mire andar mire maujud ko nabud kiya
kaun hai
jo miri rag rag men jiye jaata hai
miri duniya se mujhe mulk-badar rakhta hai
Leave a Reply