bujha.i aag to raushan hua dhuan sa kuchh
hamare haath men aaya hai ra.egan sa kuchh
qadam qadam pe dhaḌakta hai dil umidon ka
qadam qadam pe hai dar-pesh imtihan sa kuchh
kahin pe naqs mile aur koi baat bane
vo DhunDte hain mire suud men ziyan sa kuchh
vahi to ban gaya baa.is girani-e-jan ka
rakha tha ghar men kahin par jo ḳhanuman sa kuchh
ab us ke ba.ad mukammal hai dastan-e-hunar
idhar-udhar men biThaya hai darmiyan sa kuchh
koi sarab nahin hai ye meri ḳhush-nazari
jo dasht men nazar aata hai gulistan sa kuchh
hamare naam vo mansub ho gaya kyuun kar
zamin pe TuuT paḌa tha jo asman sa kuchh
ab us ki shahr men tash.hir kyuun karen ja kar
hua hai gaanv men apne jo na-gahan sa kuchh
Leave a Reply