na suni par na suni us ne dil-e-zar ki arz
kaun sunta hai bhala aise gunahgar ki arz
chalo ahista ki hoti hai qayamat barpa
fitna-e-hashr ne ye us se ka.i baar ki arz
jumbish-e-lab hai dam-e-naz.a ye kuchh kahta hai
sun to lo apne zara ma.il-e-guftar ki arz
zikr-e-aghyar se chhiḌka kiye zaḳhmon pe namak
dam-e-kushtan na suni kushta-e-talvar ki arz
mad.h-ḳhvan al-e-eba ka main rahun ai ‘tanvir’
hai ye ḳhidmat men janab-e-sah-e-abrar ki arz
Leave a Reply