Poet
itna na ghuum raat ko phulon ki baas men
so.e paḌe hain charon taraf saanp ghaas men
har samt us ne atishi shishe laga diye
saḌkon pe log aa.e the kaale libas men
gardish men zindagi rahi afvah ki tarah
umren guzar di ga.iin ḳhauf-o-hiras men
agla nisab nur-e-basirat se paḌh liya
ankhen to chhoḌ aa.e the pahli class men
ye aur baat zer-e-zamin dafn ho ga.iin
varna jaḌon ka ḳhuun hai phal ki miThas men
ab baar baar us ki taraf dekhte ho kiya
ab sirf meri tishna-labi hai gilas men
manzar kisi tilism ki zad men na ho ‘nasim’
sarson ka rang dauḌ raha hai kapas men
Leave a Reply