Koi Dekhe Adhura-Pan Hamara

koī dekhe adhūrā-pan hamārā

ki ghar bhī hai to be-āñgan hamārā

inheñ hargiz na roko kholne do

inhī bachchoñ meñ hai bachpan hamārā

abhī kuchh aur sāñsoñ kī havā do

sulagtā rah gayā hai tan hamārā

tumheñ bhī le chale pardes sājan

zarā lagne lagā thā man hamārā

tum aa jaao hare ho jā.eñge ham

harā-pan le gayā sāvan hamārā

har ek jānib se chhīñTeñ aa rahe haiñ

magar be-dāġh hai dāman hamārā

Leave a Comment