is miTTi ko aise khel khilaya ham ne
ḳhud ko roz bigaḌa roz banaya ham ne
jo socha tha vo to ham se bana nahin phir
jo ban paaya us se ji bahlaya ham ne
gham ko phir se tanha.i ke saath men mil kar
hanste hanste baton men uljhaya ham ne
na-mumkin tha is ko hasil karna phir bhi
puuri shiddat se ye ishq nibhaya ham ne
us ki yaden bojh na ban jaa.en sanson par
so yadon se apna dil dhaḌkaya ham ne
kah dete to shayad achchhe ho jaate par
ḳhamoshi se apna maraz baḌhaya ham ne
us ka chehra dekh liya tha ek dafa phir
in ankhon se salon qarz chukaya ham ne
Leave a Reply