Sewak Nayyar
ḳhaak tak mere ashiyane ki
le uḌi hai hava zamane ki
apni taqdir azmane ki
aarzu hai kisi ko paane ki
kya karoge hamara dil le kar
tum ko aadat hai bhuul jaane ki
sach kaho kis se pyaar hai tum ko
ham se kya baat hai chhupane ki
ham yunhi chahte rahenge tumhen
ham ko parva nahin zamane ki
barq-o-baran se puchh ai bulbul
dastan mere ashiyane ki
koi tadbir ai dil-e-nadan
baat bigḌi hui banane ki
saqiya teri mai-fishan nazren
aabru hain sharab ḳhane ki
ham ko pamal kar ga.i ‘nayyar’
har ada sang-dil zamane ki
Leave a Reply