ahmad-javed

Ek Tassur

khamoshi hamesha se utni hi gahri hai

jitni ki canvas se mavara tasvir

tum aisa nahin samajhte kyaa?

ankhen jo hamen di gai hain

kisi anadi musavvir ki ghadi hui aag ke

shola-e-siyah ke bil-muqabil

kaafi hain nazar-andaz karne ke liye har chiiz ko

jo zahir hai rangini ke saath

ye aala darje ki sanjidgi hai

ek mukammal dimagh ki fauqul-hafiza gahrai ka moti

siyah rakhshanda aur muhib!

tasvir-e-na-shuda timsal

kabhi nahin tikti us aaine ki phisalavan satah par

jo khud aks hai kisi aur aine men

puuri maharat se

intihai himaqat se

nahin, main nahin dekh sakta vo ghair-manquta nuqta

jo kashf se ariiz hai aur muraqabe se vasia!

ab lazim hai ki tasvir kiye jaaen

khamoshi ki tah aag ka batin aur

muqaddas tanhai!

to kahan hai tumhara barush?

More Poems

Leave a Comment