Nivesh Sahu
dariya se iḳhtilat hai ham ro nahin rahe
rona hamari zaat hai ham ro nahin rahe
is bad-dimagh dil ne kiya zabt ka bhi ḳhuun
ye sirf vardat hai ham ro nahin rahe
kitne dinon ke ba.ad ḳhushi se mile hain ham
phir bhi ajiib baat hai ham ro nahin rahe
ye din bhi koi din tha ajab ḳhush-gavar din
ye raat koi raat hai ham ro nahin rahe
rone lage to kaun hamen chup kara.ega
so is ka ehtiyat hai ham ro nahin rahe
aansu kama.e hain so tire diin ke liye
maula yahi zakat hai ham ro nahin rahe
Leave a Reply