Jitendra Mohan Sinha Rahbar
zaḳhm kya ubhre hamare dil men un ke tiir ke
gul khile goya ki ḳhvab-e-ishq ki ta.abir ke
pasban ne gham diya aur ham-damon ne jaan li
aaj qaa.il ho ga.e ham gardish-e-taqdir ke
ḳhud likhi hai ḳhun-e-dil se ishq ki har dastan
zer-e-ehsan main nahin huun katib-e-taqdir ke
rakh diya hai likhne vaale ne kaleja chiir kar
hai musannif munkashif har lafz men tahrir ke
main ne jab mayus ho kar honT apne si liye
phir ho kyuun mushtaq itne tum meri taqrir ke
phir vahi sauda vahi vahshat vahi tarz-e-jun.un
hain nishan maujud saare ishq ki tasir ke
justuju-e-did men phirte hain sar-garda mudam
har qadam par hain muqabil aap ki tasvir ke
be-kason ma.asum ki mushkil-kusha.i kijiye
chhuTna chakkar se hai gar asman-e-pir ke
ḳhidmat-e-har-mustahiq vo kar-gar tadbir hai
qufl khul jaate hain jis se bandish-e-taqdir ke
dekhte hain dusron ki aankh ke til men bhi aib
be-ḳhabar hain lekin apni aankh ke shahtir ke
tum fara.ez-mansabi anjam do ‘rahbar’ faqat
mat paḌo jhagḌe men tum taqdir-o-tadbir ke
Leave a Reply