Bhes Banae Ghum Raha Hai Diwana Galiyon Galiyon

bhes banā.e ghuum rahā hai dīvāna galiyoñ galiyoñ

kaun milegā dekheñ apnā begāna galiyoñ galiyoñ

saḌkoñ par pahra detī āñkhoñ se uljhe kaun bhalā

tum ko aanā ho to ab ke aa jaanā galiyoñ galiyoñ

dekho ik din thak jā.eñge thak ke ruk jā.eñge qadam

vahī sub.h se shaam tumhārā bhaTkānā galiyoñ galiyoñ

dil kī manzil thī ki havas kī gardish thī ma.alūm nahīñ

jaane kaun liye phirtā thā an-jānā galiyoñ galiyoñ

ai ‘āzād’ yahī niklā sadiyoñ kī masāfat kā hāsil

ek udāsī ke aalam kā chhā jaanā galiyoñ galiyoñ

Leave a Comment