Saqib Lakhnavi
milta jo koi TukḌa is charḳh-e-zabarjad men
paivand laga deta main nafs-e-mujarrad men
bedari-e-furqat men tha ramz qayamat ka
jaaga huun ki niind aa.e tariki-e-marqad men
is daftar-e-hasti men talim bahut kam hai
do harf nazar aa.e dibacha-e-abjad men
go ḳhaak ka putla huun lekin koi kya samjhe
main bhi koi shai huun jo gardun hai miri kad men
hai zabt ki farma.ish is dil se bahut beja
ye qulzum-e-la-sahil kis tarah rahe had men
pahlu men nahin dil to dil-soz hi aa jaata
ik sham.a to jal jaati tariki-e-marqad men
nalon se ye kahta huun himmat se na dil haren
taron ne jagah kar li is lauh-e-zamurrad men
Leave a Reply