ham aziiz is qadar ab ji ka ziyan rakhte hain
dost bhi rakhte hain to dushman-e-jan rakhte hain
tab.an insan to dil-dada-e-fasl-e-gul hai
ham ajab log hain jo zauq-e-ḳhizan rakhte hain
ariz-e-gul ho lab-e-yar ho jam-e-mai ho
jism jal uThta hai ham honT jahan rakhte hain
vaqi.a ye bhi hai haq baat nahin kah sakte
ye bhi da.ava hai baja munh men zaban rakhte hain
jis jagah dil tha vahan hasrat-e-dil baaqi hai
jis jagah zaḳhm tha ab ek nishan rakhte hain
ham se kar jaata hai vo shaḳhs fareb aḳhir-kar
jis ke baare men bhi ham nek guman rakhte hain
‘shaukat’ uslub-e-ghazal hai muta.ayyan taham
is men ham munfarid andaz-e-bayan rakhte hain
Leave a Reply