Saghar Siddiqui
mata-e-kausar-o-zamzam ke paimane tiri ankhen
farishton ko bana deti hain divane tiri ankhen
jahan-e-rang-o-bu uljha hua hai un ke Doron men
lagi hain kakul-e-taqdir suljhane tiri ankhen
isharon se dilon ko chheḌ kar iqrar karti hain
uThati hain bahar-e-nau ke nazrane tiri ankhen
vo divane zamam-e-lala-o-gul thaam lete hain
jinhen mansub kar deti hain virane tiri ankhen
shagufon ko shararon ka machalta ruup deti hain
haqiqat ko bana deti hain afsane tiri ankhen
Leave a Reply