Ahmad Javed
dil aina hai magar ik nigah karne ko
ye ghar banaya hai us ne tabah karne ko
gul-e-visal abhi dekha na tha ki aa pahunchi
shab-e-firaq bhi ankhen siyah karne ko
galim o takht utare hain ghaib se us ne
mujhe faqir tujhe badshah karne ko
saje hain dasht o bayaban ajab qarine se
tujhe savar mujhe gard-e-rah karne ko
mili mujhe tiri ham-saegi so duniya men
tamiz-e-martaba-e-koh-o-kah karne ko
damida har shajar-e-gard-bad nakhl-e-junun
hamare chak-e-gareban se raah karne ko
dil-e-gudakhta o chashm-e-tar hi kaafi hai
futuh-e-mamlikat-e-mehr-o-mah karne ko
Leave a Reply