Urooj Zaidi Badayuni
fikr-e-besh-o-kam nahin un ki raza ke samne
ye mujhe taslim hai arz-o-sama ke samne
jo talab-na-ashna ho ma-siva ke samne
haath phailati hai duniya us gada ke samne
ye kamal-e-jazb-e-dil meri nazar se duur tha
aap ḳhud aa ja.enge parda uTha ke samne
sochna paḌta hai kyuun bebas huun kyuun majbur huun
main sar-e-aghaz-o-fikr-o-intiha ke samne
vo to kahiye mera dil amaj-gah-e-shauq hai
varna kaun aata hai tere be-ḳhata ke samne
kya bata.un meri gharqabi men kis ka haath tha
naḳhuda ko pesh hona hai ḳhuda ke samne
TuuT ja.ega tililsm-e-rasti-o-rahbari
main agar a.ina rakh duun rahnuma ke samne
ai zamir-e-zinda mere har-qadam par ehtisab
nama-e-a.amal ja.ega ḳhuda ke samne
andhiyan un ko bujha den andhiyon ki kya majal
main ne vo sham.en jala.i hain hava ke samne
shiddat-e-ehsas-e-tauba ka vo aalam hai ‘uruj’
jaam mere samne hai main ḳhuda ke samne
Leave a Reply