shurua silsila-e-did karne vaala tha
ta.aruf-e-ruḳh-e-tauhid karne vaala tha
ḳhud us ki zuud lisani ne us ko gung kiya
vo mere haal pe tanqid karne vaala tha
mizaj-e-yar ne baḳhshi thi aisi yak-rangi
kahan main ghair ki taqlid karne vaala tha
tu muntaha ko pahunch kar bhi sifr hai ab tak
tujhe main vaqif-e-tamhid karne vaala tha
hamari saal men do baar jaan jaati hai
vo shaḳhs roz hi ik iid karne vaala tha
vo mere va.az se masjid men jab sambhal na saka
sharab-ḳhane men takid karne vaala tha
bacha ke fikr ko talḳhaba-e-tavarud se
ghazal ko ḳhugar-e-ta.aqid karne vaala tha
vo ham-piyala bhi tha ḳhvaja-e-tash bhi ‘kavish’
jo baat baat pe tardid karne vaala tha
Leave a Reply