Zakir Khan Zakir
ik ishq-e-na-tamam hai rusva.iyan tamam
ugne lagi hain jism men tanha.iyan tamam
kya shahr-e-arzu tha basa aur ujaḌ gaya
ab sar-kashida phirti hain purva.iyan tamam
sanson ke zer-o-bam se hai saghar men iztirab
jam-o-subu se pur-asar angḌa.iyan tamam
roz-e-azal se sochte zehnon ki ham-safar
sahra ki dhuup aur ye parchha.iyan tamam
harf-o-sada ki lai pe jo utra tira ḳhayal
bajne lagi hain ghazlon men shahna.iyan tamam
garche piro.e sher men jazbat-e-rang-o-bu
lekin bayan na ho sakin gahra.iyan tamam
uThte rahe hain shaan se yaran-e-mai-kada
hoti rahi hain dahr se ra.ana.iyan tamam
aamad ka silsila nahin sher-o-suḳhan men aaj
phaili hui hain qafiya-paimaeyan tamam
‘zakir’ nashist-e-dard maqam-e-ḳhirad bhi hai
mansub is ḳhirad se hai bina.iyan tamam
Leave a Reply