Poet
pari-paikar jo mujh vahshi ka pairahan banate hain
gareban chaak kar dete hain be-daman banate hain
junun men ja-ba-ja ham jo lahu rote hain sahra men
gulon ke shauq men virane ko gulshan banate hain
jinhen ishq-e-dili hai vo tumhara naam japne ko
taharat se hamari khaak ki misran banate hain
muraqqaa khinchte hain jo tire ganj-e-shahidan ka
tah-e-shamshir har tasvir ki gardan banate hain
diya karte ho tum jis tarah se bal zulf-e-pechan ko
musafir ke liye yuun phansiyan rahzan banate hain
hasinan-e-chaman par khatma hai jama-zebi ka
phata padta hai joban jo ye pairahan banate hain
hamesha shefta rakhti hai apni husn-e-qudart ka
khud us ki ruuh ho jaate hain jis ka tan banate hain
irada hai jo shamshir-e-do-dam ke munh pe chadhne ka
tire jan-baz chaar aina o joshan banate hain
raha karte hain vo dil men phira karte hain nazron men
ata karte hain nuur ankhon ko dil raushan banate hain
salah-e-ishq de de kar kiye dete hain khud rafta
tire shaidai dil se dost ko dushman banate hain
koi chak-e-jigar bulbul ka gul-chinon se paata hai
nikharne ko gul apne apne pairahan banane hain
gulon ke dher la la ke chaman se us men phunkenge
qarib-e-bostan bedad-gar gulkhan banate hain
madad tayar hai naqsha iram ka khinch ke aaya hai
shahid-e-naz par rahm aa gaya madfan banate hain
muraqqaa khinchte hain baagh ka jo husn qudrat se
gul-e-shadab ka kya rang kya roghan banate hain
taalluq zeb-o-zinat se nahin kuchh khaksaron ko
‘sharaf’ mitti men rangte hain jo pairahan banate hain
Leave a Reply