Wahid Premi
shiddat-e-shauq asar-ḳhez hai jaadu ki tarah
dil ki dhaḌkan ki bhi avaz hai ghunghru ki tarah
main vo divana-e-halat huun sahra sahra
jo phira karta hai bhaTke hue aahu ki tarah
jaane kis rang men aa.i hai baharan ab ke
phuul bhi zaḳhm sa shabnam bhi hai aansu ki tarah
vo jo amvaj-e-havadis men hain palne vaale
un ko tufan nazar aata hai lab-e-ju ki tarah
gum-rah-e-shauq ko hamrah dikhane ke liye
zulmat-e-shab men chamakte rahe jugnu ki tarah
fikr-o-fan ki na.e gul-daste saja kar ‘vahid’
aao bas jaa.en har ik zehn men ḳhushbu ki tarah
Leave a Reply